الرااااااااااااااااكوبه

بت الريف يا اخونا رد الله غربتها قالوا جاها لوتري وسافرت الخرطوم اتكلمت زمان زمن سودان نيو عن الراكوبة وانا بعيد كلامة بصورة تانية
بالجد اشتهينا الراكوبة والونسة فوقا
بس راكوبة ما فيها حديد شعب بس ومعروشة بي حصير وفوقا كم عنقريب هباب موسرات بالحبل وبنابر وزير موتو ساقطة وفي راسو في قرعه ما كوز يا حليل زمن الشراب بالقرع مش بالكبابي
بتخيل منظرنا وكلنا قاعدين فوق الراكوبة النسوان والبنات بي جهة ديل بتمشطن يا حليل زمن المشاط والمساير والسودان قفل ( نوع من المشاط ) وواحدت طاقات الحنك مع بعض يتكلمن في عرس بت فلانة الجابو ليها جيب السرور واحدة قالت شوف عيني ما قول قايل الشنطة العروس ما واحدة هي عاد جابو ليها التياب شنطة والايسكرتات والبلوزات شنطة والشباشب والشنطة شنطة وامها واخواتا شنطة براهم
والتانية بتنبزعن في جارتا القالت جنها شحدة والله كان كوركت ليها للملح الرخيص دا تقول ليك ما عندي وهي تشحد شحدت الجن وديل كلهن قدامن واحدة بتسوي عاد في الجبنة الماخمج جبنة فاهمة بي الجنزبيل
والبنات قاعدت حارسات ست الودع تعين لي دي تقول ليها صافحوك تب يا بت امي والله كان على صفاح الودع السودان دا ما كان فضلت فوق بت ما متزوجة وتعاين لي ديك تقول ليها القروش جنك والطية حمدتك ( هدية يعني )
اها والرجال ديل بعيد في ضل الديوان مستنين الجبنة وعلوني يكورك ويقول هوي الجبنة دي ما تجييبنا في سيرمس ولا شئ في جبنة طين وكمان معاها الفناجين شراب الجبنة بالكبابي دا ما بكيف وبتكلم في الكورة وفي الصادق والشباب ناس راسكل وامير وتووحه ومعاهم مجموعة في فلانة سمحة وفلانة شينة
والونسة بتجر في الراكوبة والمواضيع بتكتر
وبنتلاقا